Melrakkasetrið sinnir sínu nærsamfélagi og býður nemendum í Grunnskóla Súðavíkur upp á fræðslu um melrakka, mýs og fleiri spendýr í íslenskri náttúru. Grunnskóladeildin er einsetinn skóli fyrir 0. - 10. bekk. Nemendum er kennt í þremur námshópum: unglingastigi, miðstigi og yngsta stigi. Fimm ára nemendum er kennt með yngsta stigi í allt að 13 stundir á viku.

Forstöðumaður Melrakkasetursins kemur tvisvar í hvern námshóp í eina til tvær kennslustundir í senn, styst hjá yngsta hópnum og lengst hjá þeim elstu. Börnin læra um spendýr á Íslandi með sérstakri áherslu á hagamýs og melrakka.

Má segja að börnin séu mjög áhugasöm og mörg hver ansi vel að sér um spendýrin okkar, margar nýjar hugmyndir hafa vaknað um efni og framsetningu á sýninguna í kjölfar þessara skólaheimsókna.

Börn og eldri borgarar Súðavíkur þurfa ekki að greiða sig inn á sýninguna og fá sérstakt aðgangskort því til staðfestingar. 

Melrakkasetur Íslands og Náttúrustofa Vestfjarða hafa gert með sér samning um verkefnið "Vestfirskir Grasagarðar". Verkefnið gengur út á að fjölga sýningarstöðum grasagarðs sem þegar hefur verið stofnaður í Bolungarvík, meðal annars að setja upp einn slíkan við Melrakkasetrið en við höfum hug á að hafa íslenskar plöntur til sýningar á lóðinni umhverfis setrið.
Grasagarðurinn mun væntanlega vekja áhuga ferðamanna sem koma á svæðið og verða vitundarvakning um íslenska flóru.
Umsjón hefur Kristjana Einarsdóttir hjá NAVE

Melrakkasetrið hefur ásett sér að safna stærsta vefmyndasafni sem til er með ljósmyndum af melrökkum, helst sem flestum frá Íslandi. 
Myndasafnið er samansafn mynda sem safnast með frjálsum framlögum myndeigenda, einnig myndum sem við höfum sjálf tekið í starfi okkar við rannsóknir og vöktun á íslenskum refum. 
Allir sem vilja leggja þessu verkefni lið geta sent myndir sínar með tölvupósti til melrakki@melrakki.is

Hægt er að skoða myndirnar á www.melrakki.is/myndasafn
 

Halla Margrét Jóhannesdóttir hefur verið ráðin leikstjóri leikverksins Melrakka sem frumsýnt verður í Melrakkasetri Íslands í Eyrardal næsta sumar. Hún mun einnig rita handritið ásamt Kómedíuleikaranum Elfari Loga Hannessyni en það er Kómedíuleikhúsið sem stendur að verkinu. Hér er um að ræða einleik um rebba.
Kómedíuleikhúsið hlaut styrk frá Menningarráði Vestfjarða, í úthlutun á Reykhólum þann 4. desember, til að mæta kostnaði við verkið. Okkur þykir þetta mjög spennandi enda ekki verið sett á svið leikrit um tófuna áður, svo vitað sé.

Markmið rannsóknarinn er að kanna áhrif ferðamanna á atferli refa við greni í friðlandinu á Hornströndum.
Fylgst er með ferðum refahjóna til og frá greni, hvert þeir fara, á hvaða tímum og komur þeirra með fæðu heim á grenið. Sérstök áhersla er lögð á viðbrögð refanna við komu ferðamanna og áhrifum þess á viðverutíma við grenið, tíðni fæðuöflunar og ferða, hvíld og varnaratferli. Fæðan sem refirnir bera heim á greni er skráð niður og athugað hvort og þá hve mikill hluti fæðu er fenginn frá ferðamönnum.

Melrakkasetur Íslands og Náttúrustofa Vestfjarða eru í samstarfi við Háskóla Íslands um krufningar á veiddum refum á Vestfjörðum. Um er að ræða tilraunaverkefni þar sem gerðar eru markvissar rannsóknir á veiddum refum í fjórðunginum og upplýsinga aflað, m.a. um stofngerð.
Vorið 2009 var verkefnið kynnt fyrir öllum sveitafélögum á Vestfjörðum og hefur Súðavíkurhreppur þegar hafist handa og þar söfnuðust hátt í fjörutíu dýr á sl. ári.

þátttakendur í verkefninu eru jafnframt meðlimir Vestfjarðaklasa Íslands í norðurslóðaverkefninu The Wild North og er styrkt af NORA. Þátttökulöndin eru Færeyjar, Grænland, Noregur og Ísland. Rannsóknir okkar og vöruþróun, þar sem melrakkinn og annað dýralíf á Vestfjörðum er gert að auðlind í ferðaþjónustu á sjálfbæran hátt, fellur vel að hlutverki okkar í The Wild North. Hefur Vestfjarðaklasinn óskað eftir því að einn árlegu vinnu- og námskeiðsfunda TWN verði haldinn á Ísafirði. Sá fundur og námskeið yrði opinn öllum áhugasöm og gæti orðið mikilvægt innlegg í ferðaþjónustumálum í fjórðunginum.

Melrakkasetrið er þátttakandi í norrænu samstarfsverkefni sem kallað er The Wild Nortð, eða Hið Villta Norður.
Helstu markmið þátttakenda Wild North verkefnisins eru að leggja sitt af mörkum við uppbygginu sjálfbærrar, náttúrulífsferðaþjónustu (wildlife tourism) á Norðurslóðum, og treysta með því undirstöður greinarinnar, afkomu þeirra sem í henni vinna og notkun auðlindarinnar til langs tíma.
Þátttakendur verkefnisins eru ferðaþjónustufyrirtæki sem sérhæfa sig í ferðamennsku tengdri villtum dýrum, opinberir aðilar og ýmsar rannsóknastofnanir. Wild North er alþjóðlegt samstarfsverkefni með samstarfsaðila á Íslandi, í Noregi, Færeyjum og á Grænlandi. Ráðgjafi verkefnisins er Deborah Benham frá Dolphin Space Programme í Skotlandi.
Melrakkasetrið er leiðtogi Vestfjarðarklasa verkefnisins, meðþátttakendur eru Náttúrustofa Vestfjarða, Rannsókna- og fræðasetur HÍ á Vestfjörðum, Vesturferðir og Borea Adventures.

Melrakkasetrið hvetur til handverks framleiðslu með tilvísun í villt dýr, Vestfirði og tengt málefni.
Áhgugi er fyrir allskonar hlutum og handverki sem hægt er að selja ferðamönnum og til ýmissa nytja, úr allskonar efni og af ýmsum stærðum og gerðum.
Við höfum áhuga á að taka í umboðssölu ýmsan varning sem helst ekki hefur sést hér til sölu áður, en einnig hefðbundna muni svo sem prjónels, trévörur og fleira...
 

Eitt af meginmarkmiðum með stofnun Melrakkaseturs Íslands var að setja upp sýningu um melrakkann og allt sem honum viðkemur í fortíð og nútíð, líffræði hans og þróunarsögu. Ennfremur að segja sögu refaveiða og refaræktar en líklegast eru refaveiðar ein elsta launaða starfsgrein íslendinga.
Sýningin verður til húsa í gamla Eyrardalsbænum í Súðavík, sem hefur verið gert upp og er hið glæsilegasta. Í húsinu verður safn minja og muna um refaveiðar, lifandi myndefni, uppstoppuð dýr og áhugaverðir hlutir sem hægt er að skoða með hjálp tækninnar og hefðbundinna tækja... sjón er sögu ríkari.
Jafnframt verður lítið kaffihús og handverkssala, leikhús og náttúrubíó á loftinu auk aðstöðu fyrir vísindamenn sem vilja vinna verkefni tengd melrakkanum, á ýmsum fagsviðum.
Allir í stjórn Melrakkaseturs hjálpast að við sýninguna, ásamt Fífu (Auður Alfífa) og Finni Arnari (sýningarhönnuði) og fleirum