Eins og áður hefur komið fram á heimasíðunni, lést Páll Hersteinsson, hugmyndasmiður og verndari Melrakkasetursins, í október 2011.

Páll var virtur og afkastamikill fræðimaður, bæði á íslenskri og erlendri grund. Rannsóknir hans á tófunni, sem hófust  á 8. áratug sl. aldar, stóðu yfir í rúm 32 ár og hafa leitt í ljós mikilvægar upplýsingar um líffræði og stofnvistfræði tegundarinnar á Íslandi og erlendis.

Kollegar Páls og vinir í norður Noregi söfnuðu dágóðri upphæð sem þau hafa ánafnað Melrakkasetrinu í minningu Páls. Við erum stolt og þakklát fyrir framlagið og munum gera okkar besta til að halda uppi nafni og starfi Páls með rannsóknum á melrakkanum á Íslandi.

Fjárhæðin, sem norsku vísindamennirnir söfnuðu, hefur verið færð inn á sérstakan reikning sem stofnaður hefur verið. Hugmyndin er að stofna sjóð í nafni Páls, sem opin verður fyrir framlögum. Markmið sjóðsins verður að styðja við áframhaldandi rannsóknir á tófunni og efla alþjóðlegt samstarf á vettvangi tófurannsókna. Þeir sem leggja fé inn á reikninginn og vilja fá staðfestingu eða láta nafns síns getið eru beðnir um að senda tölvupóst til melrakki[@]melrakki.is

Við þökkum kærlega fyrir stuðninginn  

f.h. Melrakkaseturs Íslands

Ester Rut Unnsteinsdóttir

 

Frekari upplýsingar.

MINNINGASJÓÐUR PÁLS HERSTEINSSONAR

Reikningsnr:  0154-15-200526

Kennitala :  660907-1060