Guðmunda Guðmundsdóttir (f. 10.6. 1926) er yngsta dóttir Guðmundar Einarssonar refaskyttu frá Brekku á Ingjaldssandi. Bókin „Nú brosir nóttin" eftir Theodór Gunnlaugsson, fjallar einmitt um æviminningar Guðmundar.
Eiginmaður Guðmundu, Jón Hafsteinn Oddsson (f. 1. 7. 1926 - d. 23. 7. 2007), frá Álfadal á Ingjaldssandi, var einnig grenjaskytta og einn af afkastamestu veiðimönnum síns tíma. Í viðtali sem Valdimar H. Gíslason, sagnfræðingur og refaskytta frá Mýrum í Dýrafirði tók við Guðmundu á síðasta ári, segir hún frá þessum tveimur mönnum, útbúnði þeirra við veiðar, nesti og fleiru. Viðtalið er í fullri lengd á sýningu Melrakkasetursins. 
Á sýningunni eru fleiri munir frá Guðmundu, forláta fótbogi sem eiginmaður hennar, Jón Oddsson, notaði við grenjavinnslu. Fótbogann fékk Jón hjá Sigurði Samsonarsyni frá Súgandafirði.
Á myndinni er Guðmunda með fótbogann og myndir af föður sínum og eiginmanni.
 

Nú eru aðeins örfáir dagar eftir af ágústmánuði og ferðamannasumarið að styttast í annan endann. Framundan er síðasta helgin sem við höfum opið samkvæmt sumartíma, frá tíu á morgnana til tíu á kvöldin. Á þessum tíma er bæði opið á kaffihúsinu og melrakkasýningunni.
Á mánudag, þann 30. Ágúst, verður opið á Melrakkasetrinu samkvæmt áætluðum vetrartíma eða frá tíu til fimm alla virka daga.

Tekið er á móti hópum á öðrum tímum eftir samkomulagi og er hægt að hringja í síma 456-4922 eða senda tölvupóst í gegnum heimasíðuna, www.melrakki.is. Verið er að gera ráðstefnufært uppi á lofti og við mælum með því að fyrirtæki bjóði starfsmönnum sínum í heimsókn á Melrakkasetrið. Einnig verða unnin verkefni fyrir grunn- og framhaldsskólanemendur og bjóðum við upp á skólaheimsóknir, verkefni og fyrirlestra ef óskað er eftir því.

Fyrirhugað er að hafa nokkrar uppákomur í vetur, leiksýningin „Gaggað í grjótinu" kemur aftur auk þess sem læðukvöld og tónleikar með Mugison og fleirum eru á áætluninni. Fylgist því með á heimasíðunni og á Facebook...